der uusverchouf, der uusverchouf,
der uusverchouf isch da!
scho syt em sundigaabe
stoue d lüt ir stadt sech a.
uf trotoirränd und stägeli,
mit täsche, chörb und wägeli,
umlagere si d geschäftsygäng.
es isch eis d drück und d dräng.

jiz ändlech chunnt d securitas,
für inne d tür ufzutue –
e schrei us tuusig müler,
und es es chunnt
gar nümm derzue:
denn ds volk drückt eifach
d schyben y
u quillt zu allne löcher y
u tramplet sech sy eigni gass
über d securitas.

und wyter geits im uusverchouf
scho wärded d vorrät knapp.
zwo froue wette ds glyche chleid
u schlö sech churzum ab.
me göisst, me gyxt, me müpferlet,
me chratzt, me bysst,
me stüpferlet
me hout sech mit em schirm
uf ds dach
und tätscht sich d nase flach.

der uusverchouf wär uusverchouft,
doch d lüt hei no nid gnue.
e mano nimmt fangs d kasse mit,
u ds frölein grad derzue.
u ds mobiliar wird usetreit,
u ds personal wird usegheit.
e jede nimmt, was är gärn hätt:
füürlöscher, vorhäng, fänschterbrett,
vitrine lampe, lavabo,
sogar d tapete wärde gno,
grad radikal ruumt me jitz uus,
bis es eifach nüüt me het im huus
als schärpe, gips und ziegelstei –

u d lüt göh
zfride
hei.